قصيدة ( ياهوى الجلعه – قلعة صالح امن اشمك ) شعبيه غنائية

قصيدة ( ياهوى الجلعه – قلعة صالح امن اشمك ) شعبيه غنائية
--------------------------------------------------------
ياهوى الجلعه أمن شمك ** وانه عابر عالجسر
أنسه كل هم العليه ** وأسكر بليه خمر
ــــــــــــــــ
تمشي روحي اويالجرف
نغم صفصاف بلطف
الماي بزلوفك يحف
يالجمالك كله سر
*****
ياهوى الجلعه اشحلاتك ** وانت طيب ادري بيك
تملي رياتي محبه ** وانت بايع وأشتريك
ــــــــــــــ
أه ياريحة أهلنا
ياحزنا ويافرحنا
والمنازل غدت جنه
ياوطن كلك سحر
*****
ياهوى الجلعه سلاما ** عالوجوه الباسمات
ياتمر خستاوي طيب ** من نخيل ألبهضات
ـــــــــــــــــــ
يامنادي بظل جرفنا
ياشعر مصبوغ حنا
ياكحل بعيون أهلنا
انت بعيوني قمر
*****
أنت بعيوني محنه ** وطلتك طيب أو وفا
انت جنه بعيني واكبر ** انت موقد ماطفه
ـــــــــــــــ
انت سالوفه قديمه
معضد بمعصم حليمه
صرتي بعيوني يتيمه
من نويتي أعلى السفر
*****
ياهوى الجلعه عذابي ** وحيرتي بديار غربه
ياحسافه العمر غرب ** وأنقفل درب ألمحبه
ــــــــــــــــــــــــ
ضعنا تيهنا دربنا
ولاأكلنا ولاشربنا
وصار للشامت زرعنا
وضاع ياوسفه الثمر
*****
ياهوى الجلعه سلاما ** من تروح ومن تجي
مثل روجات ألمشرح ** من تميل أو تنتجي
___________
روجه مليانه محنه
وروجه معجونه ابدمعنه
صرتي نار بوسط جنه
ياحياتي امن الكدر
======================
للشاعرعلي كاظم درجال ابو عمار الربيعي

قرأت قصيدة جميلة ورائعة واسمح لي اخي العزيز استاذ علي

هوه الجلعة من أشمة روحي ترتاح

وتعيش بمسرة دوم وأفراح

وأعني باحله أحلامي

غرامي الوردي وهيامي

ماكو كذب ماكو دجل وسلاح

يا عشك ميسان يجري وي الدماء
يا صفاء ويا محبه ويا وقار ويا وفاء

تقدرينا لروعة الحروف التي كتبت في صفحات موضوعك
تحياتي شاعرنا