قصيدة مفتوحة والدعوة عامة

ليش احنه ما نفرح أبد
وكل النحبّه يبتعد
ويموت ويعبّي اللحد
ودموعنه مسفوكه

أشكال والوان القهر
تنزل علينا كالمطر
بالمية فرحة ما تمر
لا بالعلن لا بوكَة

ما قبلو نصير احرار
حركَو بلدنه بالنار
وسدو علينه الأنهار
وكل الطرق مغلوكَه

ما همّهم جوع وعطشْ
بل خير ما بيهم غطشْ
جاينا تا يلطش لطشْ
ويخلي البلد محروكَة

لو فجرو كل السبل
نبقى على درب العدل
هذا احنه نبني وما نمل
وشموعنه معلوكَه

صدكوني ما اعرف شعر شعبي
علمني الوكت من احترك شعبي
دمنا صار للفجار عمل شعبي
ياه النترجاه زياكه مفتوكه

كل يوم يتعدّى ويمر
باجر نكَول وننتظر
لشوكت مو ملنه الصبر
واعمارنا مسروكَه

نواب صارو بالدين
كَلي شهايدهم وين
راتبهم يوكّل زين
وبطونهم ملهوكَه

بالغربه كَاضين الوكت
وجروحنه دمها يكت
والوطن ما يحجي سكت
وعبراتنه مخنوكَه

ما نرضه ابد بالتقسيم
نصبر ونتحمل ضيم
وما نرضخ لأي تسليم
وافكارهم مسحوكَه