الف دارمي ودارمي بقلم عامر الحسيني

	598 صرت بسبب فركَاك مثل النواعير اسمع واعــــدي اللـــوم وبالي تفكــير

	599 اسمع واعــــدي اللـــوم واصبر واتاني يلي بوصــــالك يـــوم يعـــــدل زماني

	600 عيني تهل ادمـــــوم من غدر الاصحـــــــاب كتت بكَاية الروح حتى الشعر شاب

	601 تدري بسبب فركَاك ماظل هرش حي شوك وحسج عاكَـــــول صبخه وملح مي

	رداًعلى الشاعر الجميل نديم الشباني حين قال:- نضحك جذب بوجوه كلمن لفانه نتلاوه ويه العوز بس ما لوانه 602 نتلاوه ويــــه العــــوز حي الله بالجاي طبع الكرم موجود ماغيرّه الراي

	603 طبع الكرم موجود ما بدل اطباع نتلاوه ويــــه العــــوز مــا جمّع ارباع

	604 طحنا بزمن اطفــــال كلهم زعاطيط باكت شعر واحساس ظنهم شخابيط

	605 رجعيني للاحلام خليني اسكر كافي بمرار انعيش والدنيا تفتر

	606 صاحت عليج الروح ياروحي وينج مشتاكَه عيني تشوف يالحلوة عينج

	607 ارد انشد النجمات وي الكَمر هم انتـــــــه مثلي بليـــــــــل بالملكَــــه تحلم