باسايلك يا بحر, تقدر ترد اجواب
كم واحد صادقك, لكن غدرته وطار
قال البحر يا علي : اسمع كلام اصواب
ما طرقت أنا بابهم ، جوني غصب خطّار
هم اللي جوني طبق , ناسٍ عليّ اخشاب
خليتهم في فرح , والنوخذا مختار
وانكان واحد رحل , او من عدو انصاب
مالي دخل بالأمر , لو صابهم غدّار
يومٍ يجوني شتا , والبرد منهم صاب
والريح لو اعصفت , أو حل بهم إعصار
مالي دخل بالقضا , وبفعلي ما أنعاب
يا ما جماعة فقر , سوّيتهم تجّار
أو زادهم يا علي , لولا السمك ما طاب
والصيف لمّا يجي ، والقيظ مثل النار
الكل منهم يجي , الشيخ قبل الشاب
يسبح بمايي غصب , ويروّح الأكدار
كل يوم أفتح لهم , من رزقهم ابواب
متشوف حال الزمن , هذا الزمن نكّار
دفنوا الشواطي حصى , ويا الحصى لتراب
سيف البحر يشتكي , وينه السمك لصغار
راح السمك واختفى ، حتى القباقب غاب
المشتكى للعلي ، الواحد القهار
محاورة مع البحر
العرض العادي
المواضيع المتشابهه
