،، بنت أبويا // أحلام المصري ،،

،، بنت أبوها // أحلام المصري ،،






طول عمري بنت جدعة،
بمليون راجل
كان أبويا في القعدة

يعاملني كما الراجل
يشاور عليا ويقول:
دي مش ولية، لا...
دي راجل بنت راجل
كنت أحسبه دلع،
مانا كنت أول بنات العيلة
كنت أحسبه فخر..
مانا أصلي شاطرة،
وأقدر أشيل الشيلة
بس بعد سنين كتيرة عرفت
ان ابويا كان بيقرا الحياه
وعارف الفولة والتيلة
عارف ان الايام دوارة
وان المال والجاه
ما يقدروش وحدهم.. يعملو حياه
كان دايما يقول:
صاحب المال موجوع،
وما يحقلوش يقول.. آه!
وصاحب الجاه منظور..
كل العيون شايفاه!
أضحك واقوله:
ليه يا ابويا...؟
مانا بنتك واقدر أقول: آااااه
صرخ فيّا في مرة وقالّي:
اوعي في يوم تقوليها،
وان قلتيها يا وردة الروح..
ما تخلي حتى مرايتك.. تشوفك
ولا يوم تعايرك بيها..
وان طاف بيكي الوجع،
يا نن عين أبوكي..
غنّيها
خلّي الآااااه منك تخاف،
اوعي تخلّي ضلوعك يوم..
وكر ليها!
وأنا بنت ابوها،
مش اي بنت والسلام...
انا بنت جدعة، بمليون راجل
زي ابويا ما كان عاوز..
تماااام

جميلة معبرة بلغتك المحكية الأجمل
دمت سنبلة على تلة الحياة لا تنحني
ودّ يمتد

الله الله جميلة
حفظك الله وأدام عليك هذه النعمة في زمن التعب والظلم
نورت حروفك ضفاف النبع
محبتي

رائعة حقا أحسنت سيدتي