قصيدة مفتوحة والدعوة عامة

راح الوطن وية النفط
إجونه من يشفط شفط
صفطوا خراطمهم سفط
بالليل تحلى البوكّة

الوطن صاير أقسام
كل واحد شادد الحزام
واشلون الواحد ينام
لا ينهف بطابوكة

اي والله مسخوها مسخ
ما عاد ينفعها لبخ
حتى الهوى ما ينّفخ
كل الكّرب مفتوكَة

ليش احنه ما نفرح أبد
وكل النحبّه يبتعد
ويموت ويعبّي اللحد
ودموعنه مسفوكه

أشكال والوان القهر
تنزل علينا كالمطر
بالمية فرحة ما تمر
لا بالعلن لا بوكَة

ما قبلو نصير احرار
حركَو بلدنه بالنار
وسدو علينه الأنهار
وكل الطرق مغلوكَه

ما همّهم جوع وعطشْ
بل خير ما بيهم غطشْ
جاينا تا يلطش لطشْ
ويخلي البلد محروكَة

لو فجرو كل السبل
نبقى على درب العدل
هذا احنه نبني وما نمل
وشموعنه معلوكَه

صدكوني ما اعرف شعر شعبي
علمني الوكت من احترك شعبي
دمنا صار للفجار عمل شعبي
ياه النترجاه زياكه مفتوكه

كل يوم يتعدّى ويمر
باجر نكَول وننتظر
لشوكت مو ملنه الصبر
واعمارنا مسروكَه