منتديات نبع العواطف الأدبية - عرض مشاركة واحدة

قـائـمـة الأوسـمـة · 10-01-2009, 06:49 PM

صبر العراقي

عبد الرسول معله

يادهْري شما ترِيد تزيد لتصدِّكَـ بعد أهتم
جيب الهَم فوكَـ الهَم خليني سِما ودَلـْهَمْ
بيَّ جروح فوكَـ جروحْ تتوسّم
جرحي من ينِز بالدم
لـَضمدنـّه بجرح أعظـَم
ولتْصدّكَـ بعد أهتـم
********

لوَن أهلي يبيعوني وأحبابي يعيفوني بدرُب أظلم
ولوَن إنت تخلِّي الماي إلِيْ علكَـم
وتبِوكَـ النوم من عيني حتى بعَد ْما أحلم
و اظل أركض نهار وليل على طبعي مُحال أندم
هذا آني رضيع الضيم دُوْن الضيم ما أسلم
د كَـْصي وياي، زِيد وْياي،،، لاتصدِّكَـ بعَدْ أهتم
*******
جم ليله بليالي الضيم أساهرها ورفيجي الهمّ
أشوف من العذاب أشكال أظنه مْكَـدّر مْحتـّم
أكابِر ،ما اشمِّت عْدايْ ، خل جْروح دلاّلي بلا مَرهَم
خلِّيني عْلى جُرْف المُوت بيَّ عْضايْ تتِْحطَّم
لا تْخَلِّيْ الشمِلْ يلتمّ ، لا تخلِّي الكَـلُبْ يِحْلم
دِ جُوْر ْ، و شُوْف من بطشك بعد أهتمّ ؟
لا تْصَدِّكَـ بَعَدْ أهتم
********
يا دهري انتَ طفِلْ، والضيم مِن صدَّك جِزه وْ فاتكْ
تِدَلَّل زين إلك خالات كَـوّنَك وعمّاتك
وتشوف من الفرح أشكال وتبيع الناس لوعاتك
للمترفِّهْ تعوفِهْ، وعلى المكَـرود صُولاتك
لاتْصَدِّكَـ ألومنـّك، عرَفْتك ميّته ذاتكْ
و اظن ما مِش عداوه وْياكْ والـ خاواك وَكْت الضيج ما يِفْهَم
مالك خوي من الحفـّاي وابن الملحه ما يرهم
لا جَفّ الـ يِنَشْف دْموع عيني، ولا خَوِّيْ ولا عَمْ
أنا وحدي الـ أفوج بضيم عمري مْدرَّبْ مْعَلَّم
و لَوَنْ جُورَك يِفِتْ بِعْضايْ لا تْصَدِّكَـ بَعَدْ أهتمّ