لا تنطريني بعد ما يفل القمر
وتغفى نجوم الليل عا كتف السهر
لا تنطريني بعد ما ابيض الشعر
والنوم متل الحلم
جافاني و هجر
لا تنطريني بعد ما طال العمر
غابت شمسنا
تكسرت على مدرج الايام أنغام الوتر
واللي بقي بالبال كومة من حزن
مع فهرس الأوجاع
موجود خلف الباب في شنتة سفر
ما عاد عنا أمل بليالي الدفا
ولا دندنة مغروم بلحظة صفا
ما ضل غير الصبر وشوية ألم
وحشرجة وآهات
بعد ما كلّ البصر
لا تنطريني بعد ما شاخ القلب
والجسم متل خْيال
عا ميلة انحدر
وللي هوانا بيوم بي وعدو غدر
متل الحلم بالصيف
سكر شبابيك الوصال
ويا ريت بكلمة اعتذر
لا تنطريني بعد ما يفل القمر
رح رافق الغيمات
عا بلاد ما فيها بشر
لا تنطريني
لا تنطريني

*****