يـــا عـــراق
=======
يا عراق.........
أنت ﭼـيف أحلى وطن...
حتى الجروح اختارتك للسكن ؟؟
يا وطن.........
سكت طواحينك تعبنا ...
بعد ما ظل بينا شي يسوه الطحن
..................كل شي انطحن
يا وطن..
يا بيت أيتام
وروازينك بلايا ستور ..
وعيون الوكت وكحات شو ما يستحن
واحنه بس ﮔلوب
مصلوبات بحبال الوكت يتلولحن
يا وطن...
يا بو البساتين الوسيعـة
شبيهن عشوشك يعبن خوف..؟
ومجـفله الطيــور.
يحومن منجرات ما يرضن يجـن ؟
يا وطــن...
يا المشمس وفيّك ضخين..
شبيها ناسك لابسـه هـدوم الحـزن ؟
صيفهم يتعدا ما بيه نسمه..
ومن طاري اشته ضلوعهم يتراجفــن
يا وطــن...
يا يـوم تطينـه نتيجـه...؟
لو نگضي أعمــارنا بس نمتحــن!!
بس يا وطــن..
كــافي اختبارات وتجـارب..
احنه مو جاوبنا عن أصعب سـؤال..
وحتى ألوان الدفاتر ﭼــانت بلـون المحـن ؟
وﭼـــان دفترنا خشن
وأكل مسّاحاتنا وملينا من قــط القـلم...
ولليـوم تاكل يا وطن بأقــلامنا...
وأنت تدري
بقلمي مو مثل الأقــلام يخـط رصـاص
آنــه قلمي خطـوطـه دم
بس يا زمن
أنريد نغفه بلايـه هــم