حرية حسبالي أجد
گليبي سل من الوجد
محروگـ من جدٍ وجِد
كلمن فتاها البوگه
حسن الشيخ ناصر
======
تاليها ما عندي سكن
والحيل طاح من المحن
والنخل هم ناله الزمن
وزاد الوجع بعروكه
عواطف عبد اللطيف
======
أبيض شعر راسي غده
اجروح الكلب متعدده
والروح جثة امددة
ومن الحزن محروكه
د. أسعد النجار
=======
كالوا شبيه هذا الوطن
كلتلهم هواي الفتن
ذبلن اضلوعه وانحنن
وركيبته مخنوكه
د. أسعد النجار
=======
سلّيت والله من القهر
مالوم مكسور الظهر
عطشان وبيتي النهر
ومسددات حلوگه
حسن الشيخ ناصر
=======
گالوا لعد ليش ابعدت
كلتلهم آني ما ردت
والله تعبت وتبهذلت
أرض الوطن مبيوگه
عواطف عبد اللطيف
======
كل الوجوه اتبعثرت
وتعذبت واتمرمرت
بغيره والله ما رضت
بالگلب والله شوكه
عواطف عبد اللطيف
======
امصيبه يصاح امصيبتي
تحرج الوادم حسرتي
ماشفت راحه وسفتي
اسنين العمر مسلوكه
د. أسعد النجار
=======
كالوا اشبيكم ياعرب
أهل الشهامه والحسب
باكوا السله والعنب
واحنه النياح انضوكة
د. أسعد النجار
=======
كص الدهر مني الضلع
ولجبدتي اقلعها قلع
وعظامي خلعهن خلع
مسحونه ومطروكه
د. أسعد النجار
=======
مگرود حظه ما لچه
ولانفع وياه البچه
مچتول ماظن تدرچه
وشتخيط من شگوگه
حسن الشيخ ناصر
=======
شيفضها وي هذا الدهر
لو راد يوليله بشر
بيته يظل طول العمر
ضوياته ما معلوكه
د. أسعد النجار
=======
للديره اجوا عدهم غرض
أفكارهم كلها مرض
لتبالي ابطول وعرض
راياتهم ملبوكة
د. أسعد النجار
=======
الهتاف صار بفد فلس
والحفرة لا ما تنترس
والغيم سد نور الشمس
كلمن يدلل سوگه
عواطف عبد اللطيف
======
هذا العراق بكل فخر
عالي يظل طول الدهر
متهمه آهات وكدر
ويزهي النخل بعثوكه
د. أسعد النجار
=======
تعبت أيديه وآنه أعد
بالغربة كل يوم بدرد
كللولي لا لا لا ترد
سچتنة ما مطروگه
عواطف عبد اللطيف
======
هذا التراب المرتوي
بدمع گلبي المنچوي
وذراعنا ما يلتوي
وللعدو مثل الشوكه
كريم سمعون
======
روحي إلك بس تنتظر
غاب النجم ويه البدر
گلبي يخاف من الغدر
من الظلم محروگه
عواطف عبد اللطيف
======
طلعوني من بيتي غصب
عمية ورموني بالدرب
والوطن دمروه بالحرب
وراياتنا مبيوگه
عواطف عبد اللطيف
======
تعبوني والله من القهر
حتى الصَبُر مني طفر
والجوع كسَّر لي الظهر
والخبز صعب نظوگه
عواطف عبد اللطيف
======
هذا الزمن ماينوصف
جتنه الرعاع ويا أسف
تبوك بعلن وبكل صلف
وكلمن يعلي طوكة
د. أسعد النجار
=======
كالولي ابشر خلصت
وايامنه السوده انكظت
شتريد نفسك وشتهت
ناكل هوه بخاشوكه
محمد الفهد
======
الناس والله معذبه
والسلطة دوم اتجذبه
حاجاته كلها مسبه
وخلكانها مشكوكه
د. أسعد النجار
=======
مليت بس من الركض
بالطول اركض والعرض
ضايع وتايه بالارض
ما املك الطابوكه
محمد الفهد
======
الگمر مل من القهر
والوجع هم زاد وكبر
بالوجه تاركلي أثر
أشلون أسد فتوگه
عواطف عبد اللطيف
======
الوطن روحه مغوركَه
ودمع الأرامل يحركَه
وبس الكَلوب معلكَه
بلحظة أمل لو تبوكَه
ازدهار الانصاري
======
مدري عليمن أنتجي
ميفيد أبد كل الحجي
تعبت والله من البجي
ودمعتي محروگه
عواطف عبد اللطيف
======
الناس كلها اجواعه
واعلى الاكل تتلاعه
راح البلم وشراعه
بس ماي ظل ريوكه
د. أسعد النجار
======
والماي كله أمراض
ومصيبة كلهم وعاظ
وبحجيهم حياتنا رياض
طلعت جذب مبيوكه
ازدهار الانصاري
======
نواب بس نص استاو
شما تطلب وكَالو ناو .. no
الالف باكَوه والواو
والي يعارض سوكَه
محمد الفهد
======
يبقه العراق بكل وقت
شامخ ومثله ماشفت
وبس بيه والله آنه ارتحت
بروحي هواه وشوكه
د. أسعد النجار
=======
خايف عليَّ من الهوة
الجرح ماله أي دوة
والليل نام بلا ضوة
بالجطل صرنه نبوگه
عواطف عبد اللطيف
=======
ظلمــه الجهات الأربعه
والحجي ياهو اليسمعه
بس نوم ما واحد وعه
والدنيه هالمحروكه
محمد الفهد
=======
كالولي بس كافي السهر
من الليل كاعد للسحر
بس تشرب وتاكل قهر
يلضحكتك مخنوكه
محمد الفهد
=======
بقاموسنه مسحو بعد
والفرح باكوه والسعد
والعدل من عدنه شرد
ونبعنه كلمن سوكه
محمد الفهد
=======
ضحك الچذب اصبح صفـه
والصدگـ كـل مايـه صـفــه
خاطوا وكـتنه ومـا صـفــه
وبيد ارعن الخاشوگه
حسن الشيخ ناصر
=========
مالكم حرگتوا الشعب
بين النهب والشـغب
موچنتم ويانا عجب
ترى الظلم مانروگه
عبدالناصر طاووس
======
ملينة والله من الحچي
صار الوكت كله بچي
ألمن نروح ونشتچي
وأرواحنه مخنوكه
عواطف عبداللطيف
=======
مليت يوميه خبر
والجذب اكثر من مطر
شما صار كالولي قدر
انباك التمر وعثوكه
محمد الفهد
=======
لطمية يوم الچبتوه
ما بقى شي ما بكتوه
حتى الأكل ما عفتوه
والطاوة هم محروگه
قصي المحمود
=======
اشوكت يخلص هالقهر
كل يوم من عنده بدهر
والليل كله بس سهر
وجبيدتي مطگوگه
عواطف عبداللطيف
=======
ياهلا مبارك صحبته
فرحان والله بشوفته
والرحمة علي ولدته
وهزبت بكاروكه
قصي المحمود
=======
احْنا اذا رِدْنا النَجِمْ
بَسْنا نبالغ بالحِلِمْ
لازم نِشِدْ اِيدْ اُوعَزِمْ
نِنْطِي الوطن اِحْكوكه
شاكر السلمان
=======
صار الوطن ساحة قدم
بس ساحه ما بيها حكم
كلمن لعب بيها انتقم
ما ذكر ربه الفوكه
محمد الفهد
========
تدرون لو محد دره
صار الوطن بيع وشره
شنسوي هذا الي جره
واتفقوا اعله البوكه
محمد الفهد
======
اشكد نزف هاذ الوطن
بهاذ الزمن وبكل زمن
وابناءه ما الهم ثمــــن
من ماي دمهم ضوكه
علي عبدالحسين
=======
لا بعد شيفيد الحچي
صار الوطن يبچي بچي
مدري عليمن ينتچي
ضيعوا كل حگوگة
عواطف عبداللطيف
========
ننتجي أعليمن ياتره
ايكلنه عالصار وجره
الشهم صاير مسخره
والوطن نازل سوكه
ناظم الصرخي
========
حسبالي نفرح خضرت
شجرتنه لاكن طلعت
حرب بحرب كلهه كضت
محترك تحته وفوكه
محمد الفهد
========
طفوا علينه الاضويه
وكفت اغراض التهويه
والماي هم راح انكطع
واللاله هم محروكه
علي الخضري
========
كولوي شنهو اليصار
الجار ياكل بالجار
ما بقى حرمه للدار
كلشي نفك من سوكه
عواطف عبداللطيف
========
يا ناس وين اهل الوفه
راحو بعد ما ضل دفه
والطعنه اجتنه من الكَفه
والموت عامر سوكَه
حنان الدليمي
=========
ياناس وين الأحباب
عيوني بقت علـَ الباب
والوطن صاير عطاب
نامت عليه طابوكه
عواطف عبداللطيف
========
جينة الأحبة انشوفهم
لا ما كَدرنا انعوفهم
قدّرنا صعبة اظروفهم
والوفي حاركَـ شوكَه
سعد السعد
========
گلبي تمرمر وأنجوه
والنفس صار بلا هوه
ما بعد ينفع بي دوه
وبعبرتي مخنوكه
عواطف عبداللطيف
========
هدو النفوس بكل رضا
بقلب القناعه الموعظه
محد بأفراحه حظى
وباب العمر مطبوكَه
حنان الدليمي
========
أتمنى بس اهواكم
واكَضي العمر ويّاكم
مالي خلكَـ أنساكم
مالي سواكم جوكَه
سعد السعد
========
باكَو وطنه يا ربع
وانطونه حسرات ودمع
بخيراتنه شبعوا شبع
وضل النخل وعثوكَه
حنان الدليمي
========
راح الوطن ويه النفط
إجونه من يشفط شفط
صفطوا خراطمهم صفط
بالليل تحلى البوكَة
سعد السعد
========
الوطن صاير أقسام
كل واحد شادد الحزام
واشلون الواحد ينام
لا ينهف بطابوكَة
عواطف عبد اللطيف
========
اي والله مسخوها مسخ
ما عاد ينفعها لبخ
حتى الهوى ما ينّفخ
كل الكَرب مفتوكَة
سعد السعد
========
ليش احنه ما نفرح أبد
وكل النحبه يبتعد
ويموت ويعبّي اللحد
ودموعنه مسفوكه
حنان الدليمي
========
أشكال والوان القهر
تنزل علينه كالمطر
بالمية فرحة ما تمر
لا بالعلن لا بوكَة
سعد السعد
========
ما قبلوا نصير احرار
حركَوا بلدنه بالنار
وسدّوا علينه الأنهار
وكل الطرق مغلوكَه
حنان الدليمي
========
ما همّهم جوع وعطشْ
بل خير ما بيهم غطشْ
جاينا تا يلطش لطشْ
ويخلي البلد محروكَة
سعد السعد
========
لو فجروا كل السبل
نبقى على درب العدل
هذا احنه نبني وما نمل
وشموعنه معلوكَه
حنان الدليمي
========
صدكَوني ما أعرف شعر شعبي
علمني الوكت من أحترك شعبي
دمنه صار للفجار عمل شعبي
ياه النترجاه زياكه مفتوكه
قصي المحمود
========
كل يوم يتعدَى ويمر
باجر نكَول وننتظر
لشوكت مو ملنه الصبر
واعمارنا مسروكَه
حنان الدليمي
========
نواب صاروا بالدين
كَلي شهايدهم وين
راتبهم يوكّل زين
وابطونهم ملهوكَه
حنان الدليمي
========
بالغربه كَاضين الوكت
وجروحنه دمها يكت
والوطن ما يحجي سكت
وعبراتنه مخنوكَه
حنان الدليمي
========
ما نرضى ابد بالتقسيم
نصبر ونتحمل ضيم
وما نرضخ الأي تسليم
وافكارهم مسحوكَه
حنان الدليمي
========
ملينه كل يوم بأرض
رجلينه تعبها الركض
والغربه فرضوها فرض
وكَاع الوطن مبيوكَه
حنان الدليمي
========
زعلانه كاعك يا وطن
جي ضعنا وي هذا الزمن
حتى النخل صاير يون
شيّص ثمر بعثوكة
رسول الفرطوسي
==========
ا والله ما أعـوف الوطن
وانطيه لاصحاب الفتن
لو كـوخ اسويلي سكـن
وبدمي أروي عروكة
ابراهيم الغراوي
=========
صح خلصت عمـري تعب
والدنيـا راوتني العجـب
بس عـودي ظل واكف صلب
ما فاركنه عــروكه
ابراهيم الغراوي
===========
والله تعبت من الحجي
إلمن اروحن اشتجي
عيوني عمت من البجي
ومن القهر مخنوكة
عواطف عبداللطيف
==========
گلبي تمرمر ياناس
والفاس طاح عله الراس
ما بقى عدهم احساس
وجبيدتي مطكوكة
عواطف عبداللطيف
==========
تدروني مكدر انساه
گلبي تعب من فركاه
والروح تمشي لملكاه
والآه هم مخنوكة
عواطف عبد اللطيف
========
ابلادي راحت للغرب
امن الشرگ ومن الغرب
محتار في أرضي عجب
والجور ماشي سوگه
علي إدريس الغانمي
========