صرخه في السكه الخلا .. شعر / نبيل مصيلحي
 

صرخه في السكه الخلا ..!!
ــــــــــــــــــــــــــــــــــــــــــــ
الدموع جوّه العيون اتحجَّرت
والشموع جوَّه القلوب ليه انطفـت
القنبله وسط العيال بالغباوه طرطشت
جابت صغيرهم فوق كبيرهم ..
كوم بدن ..!!
لا وش بان ولا ملامح واضحه
ولا إيد سليمه ولا عيون
أو حتى رجلين ..
تجري من ظلم الطغاه ..!!
المرسى تاه جوَّه الزمن
الدموع جوّه العيون اتحجَّرت
ــــ
فينك يا طفلي تحت هدم البيت ..
وفين اختك واخوك
وفين أبوك ..
تحت هدم البيت ومات ..
مات كل شئ ....
نبض الشوارع والحواري
والزقاق ..
ملناش وجود ..!!
دخلنا جوَّه أيام الظلام
لا عيون تشوف ولا قلوب
ولا ودن تسمع ..
صرخه في السكه الخلا
واتكسَّرت فينا الظهور
الكلمه ماتت في الحناجر والصدور
كان ذنب طفلي إيه يا ناس .. ؟!
ليه النزاع .. والدم والموت الحرام ..؟!
فين عقلكم ..؟ّ!
الكرســي داس
والسلطه دخلت ..
جوَّه أحلامنا بمداس
والعقل ناسي الرب فوق
راح فين ضميركوا يا مسلمين
سيبتونا ليه تحت الهدد
ولا شعره فيكوا اتحركت
وشربتوا ليه من دمنَّا
عُرب وعجم .. !!
يا طفلي فينك تحت هدم البيت
وفين اختك واخوك
وفين أبوك
تحت هدم البيت .. ومات
مات كل شئ ..
جوَّه في عيون الزمن
والدموع جوَّه العيون اتحجَّرت
ــــ

رد: صرخه في السكه الخلا .. شعر / نبيل مصيلحي
 

رد: صرخه في السكه الخلا .. شعر / نبيل مصيلحي
 

شكرا .. أستاذة حنان
خالص مودتي
نبيل مصيلحي

رد: صرخه في السكه الخلا .. شعر / نبيل مصيلحي